قصتي مع التصميم بدأت من فوتوشوب وبوربوينت. في هذي المقالة أشاركك الخطوات اللي مشيت عليها والأخطاء اللي تعلمت منها.
البداية كانت صدفة
ما كنت أتخيل يوم إني بصير مصممة. الموضوع بدأ لما أخوي فتح مطعم وكان يبا شخص يصمم له بروشر إعلان المطعم. وقتها ما كان في أحد غيري يساعده، فقلت خلني أجرب!
استخدمت فوتوشوب وبوربوينت، وصراحة مستواي كان متدني جداً! الألوان ما تتناسق، التنسيق مو مضبوط. بس ما استسلمت.
التعلم من اليوتيوب
بدأت أشوف فيديوهات عن التصميم وأتعلم أساسيات الألوان وكيف أختار باليت، وقواعد التايبوغرافي، والتوازن البصري.
البدايات مع الأهل والأصدقاء
بعدها صارت الطلبات تجيني من أهلي وأصدقائي. كنت آخذ أسعار رمزية - المهم إني أتعلم وأطور نفسي. مع الدعم والتشجيع والمحاولة المستمرة، صرت أتحسن أكثر وأكثر.
اكتشاف أدوات جديدة
في مرحلة التعلم والتطور، عرفت عن برامج مثل Canva و Vista Create. هالأدوات سهّلت علي كثير وصرت أنجز أسرع.
بس تعلمت شي مهم: وجود هالبرامج ما يغني عن لمسة المصمم! الأدوات تسهّل الشغل، لكن الإبداع والذوق والفكرة تجي منك أنتِ.
التطور المستمر
كمصممة حاليا بدوام كامل أقلك إن دايما السوق يتغير والترندات تتغير والأدوات تتطور لكن الأهم عدم الاستسلام والاكثار من التجارب.
أخطاء تعلمت منها
الخطأ الأول
كنت أحط كل شي في التصميم الواحد. تعلمت إن "الأقل أكثر".
الخطأ الثاني
ما كنت أحفظ ملفاتي بشكل منظم. ضيعت تصاميم كثيرة!
الخطأ الثالث
كنت أقارن نفسي بمصممين عندهم سنين خبرة. هذا كسر معنوياتي في البداية.
نصيحتي لك
ابدأي الحين. لا تنتظرين تكونين مستعدة 100%. التعلم بيجي مع الممارسة. وتذكري إن كل مصمم محترف كان يوم مبتدئ مثلك.
الخلاصة
رحلتي في التصميم علمتني إن أي مهارة تقدرين تتعلمينها إذا عندك الرغبة والصبر. ابدأي بالأدوات البسيطة، تعلمي من أخطائك، ولا تقارنين نفسك بغيرك.
---
تبين تشوفين تصاميمي؟ زوري معرض الأعمال وشوفي رحلتي من البداية لليوم!
